රඟපාන්න, කලා කටයුතුවලට සම්බන්ධ වෙන්න නම් මගේ හිතේ හාංකවිසියකවත් අදහසක් තිබුණෙම නැහැ. අපේ අප්පච්චි, අම්මා, අක්කා, මල්ලි මේ හැමෝම නිතරම කලාවත් එක්ක යන ගමන දිහා මම බලාගෙන හිටියා. නමුත් මට වුවමනා වුණේ ඊට වඩා වෙනස් කෙනෙක් වෙන්න. වෙනස් දෙයක් කරන්න. ව්‍යාපාරයක් කරන්න තමයි මුල ඉඳලම ආසාව තිබුණේ. වෙළෙඳ‍පොළේ භාණ්ඩ වල මිල ඉහළ පහළ යන වෙලාවල බොහොම උනන්දුවකින් මම ඒවා දිහා බලාගෙන හිටියේ.
අතිශයින් ළගන්නා සුළු කතා විලාසය. කිසිදු ආයාසයකින් තොරව මුවට ගලා එන ඒ කතා රොත්ත තවත් පනාපුත්‍ර කුහුඹුපැණියකුගේ ආගමනයක හැඩ තල මවාපෙන්වීය. කලාව කියන දේ මට කවදාවත් අමුතු දෙයක් වුණේ නැහැ. කලාවෙන් අපේ පවුලට ලැබුණු රසික ආකර්ෂණය ගැන හොඳ අවබෝධයක් මට තිබුණා. ඒ දේවල් දිහා මම හරි ආසාවෙන් බලා හිටියා. නමුත් මට ඕන වුණේ ව්‍යාපාරයක් කරලා යහමින් මිල මුදල් හම්බ කරලා ජීවිතේ සැපවත් කරගන්න. හැමදාම මගේ හිතේ තිබුණු ආසාව ඒක තමයි. ඔහු තම රංගන ජීවිතයේ ආරම්භය සනිටුහන් කර තිබුණේ මේ ආකාරයටය.
කෙසේ හෝ අද ඔහු කලා ලෝකයේ දොරඟුළු විවර කරගෙන හමාරය. සෝමරත්න දිසානායක මහතාගේ තේරීම බොහෝ ඇගයුමට ලක්ව තිබේ. දැන් ඔහු මේ ගැන දරන ආකල්පය ඔහුගේ ව්‍යාපාරික සිහිනය මෙම ආගමනය පවු‍ලේ අය දකින ආකාරය දැන ගැනීම මට රිසිවිය.
කලාවට සම්බන්ධ වීම ගැන බොහොම සතුටින් ඉන්නේ. ව්‍යාපාරික හීනය හැබෑ කරගන්න, ව්‍යාපාර කළමනාකරණය හා සම්බන්ධ මගේ උසස් අධ්‍යාපන කටයුතු කරගෙන යනවා. ඒ අතර රඟපෑම්, රූපවාහිනී සාකච්ඡා, නිවේදන කටයුතු සඳහා ලැඛෙන ආරාධනාවන්ද හැකි අයුරින් පිළිගන්නවා. ඉතින් දැන් මට ලැඛෙමින් තිඛෙන ප්‍රේක්ෂක ආදායමත් බොහෝම ඉහළ එකක්. ඒකත් බොහොම සතුටින් බාරගන්නවා ඔහු කීවේ සිනාව උතුරා යන හ`ඩකිනි.
අපි හිතමු මෙහෙම. ඔන්න වඩුවෙක් ඉන්නවා. එයාගේ පුතා හොඳට ඉගෙනගෙන ඉංජිනේරුවෙක් හරි ලොකු තානාන්තරයක් දරන කෙනෙක් හරි වෙනවා. ඉතින් මේ වඩුවට කොයිතරම් නම් සතුටක්ද? එක දවසක් මේ වඩුව ගෙදර එනකොට දකිනවා තමන්ගේ පුතා පුටුවක් හදමින් ඉන්නවා. එතකොට ඒ වඩුවට දැනෙන ආඩම්බරකාර සංතෘෂ්ඨිය මොන තරම් එකක් වේවිද?
අද අපේ අප්පච්චිට, අම්මට දැනෙන හැඟීමත් ඒ වගේ එකක් තමයි.
කලා ලෝකයේ දැවැන්ත චරිතයකට හිමිකම් කියන ජැක්සන් ඇන්තනී නම් ආදරය තාත්තාව මද්දුම පුතා දකින්නේ මේ ආකාරයටය.
යෞවනය, ආදරය දෙකක් නොවේ. අඛිලට ආදරය දැනෙන හැටි ගැන අසන්නටද මම අතපසු නොකළෙමි. ආදරය හරිම සුන්දරයි. මේ ක්ෂේත්‍රයට එන්න හුඟ කාලෙකට ඉස්සර ඉඳලම මම ගෑනු ළමයෙක් එක්ක යාළුවෙලා ඉන්නවා. එයා අමන්දා. අපි හරි සතුටින් ඉන්නවා. දැන් ඉතින් දිගටම මම අමන්දා ගැන කියවගෙන යයි. ඊට පස්සේ මේ ආටිකල් එක අමන්දා ගැන එකක් වෙයි. කමක් නැද්ද?
(මහ හර්ඩින් සිනාසෙමින්) අඛිලගේ සොඳුරු කතාව දෝරේ ගලා යමින් තිබි. නමුත් ආයාසයකින් හෝ එයට විරාමයක් තැබිය යුතුය. අනාගත බලා‍පොරොත්තු ගැන ඔහු කී දෙය අවසන මෙහි ලියා තබමි. අධ්‍යාපන කටයුතු නිම කරගන්නත් රංගන ක්ෂේත්‍රයේ ඉදිරියට යන්නත් බලා‍පොරොත්තුවෙන් ඉන්නවා. ඒ කොහොම වුණත් වැඩි කල් නොගොස්ම මට ඇඩ්රස් නැතිවෙයි (නැවත සිනාසෙමින්) අඛිලට ඇඩ්රස් නැතිවන ආකාරය ගැන දැනගැනීම අප අනාගතයට තබමු.
0 comments:
Post a Comment